Kämmend doch nöcher I verzell' Eu a Gschicht
Vo zwei Kinder anara Häx
und amana Bösewicht
wenn iar wenn losa, denn spitzen jetzt d'Ohra
und wenn der nit z'lut sin,
denn könn der mi khöra
Im Dörfli am Fluss hen amol zwei Kinder gwohnt
d'Susi het Locka kha, an Struss von ara Pracht
der Daniel hens immer mit Lob belohnt,
er het viel könna und het schöni Sacha gmacht

Amol amana Tag sin dia Kindergo bada
der Daniel het d'Susi uf da Gepäckträger glada
dur da Wald, über d'Wiese,
über d'Stei bis an Fluss döt sind's denn ins Wasser
hen sich trockna lo am Schluss
Uf zmol isch a Ma kho, mit glänziga n'Auga
und d'Kinder hen Angscht kriagt
das könn iar miar glauba
dä Ma het si packt, het'si mitgno ganz gschwind
und tüf in dem Wald sind's verschwunda dia Kind

Im Dunkla vo n'ara Höhli
het ma n'as Für gseh brenna
vo wit här het ma n'a Flöta spiela khöra könna
wo's nöcher kho sin hen's döt a Häx gseh sitza
drei Raba hen zuagluagt
wia si an Spiess tuat spitza
Im Kessel uf em Für het scho an Absud dampft
und hie und da het si a bitz ummagrüart dri
der Ma het nüt gredet nu uf da Boda gstampft
und d'Häx isch über dä Bsuach
gar nit verwunderet gsi
Aber d'Kinder hen Angscht kriagt
im stocktüfa Wald
dia Häx isch so grusig gsi, hässlich und alt
der Bösewicht het usama Zauberbuach gläsa
het Sprüchli ufgseit und denn agfanga losa
uf d'Vögel im Wald wo immer schöner hen pfiffa
der Ma hets verstanda und Häx hets begriffa
und d'Kinder hen träumt mit da n'Auga und Ohra
a Wält isch verschwunda und a n'andari gebora

D'Auga vo der Häx hen agfanga rolla
us em Himmel hets blizt und nümma höra wella
unter der Ärda hets grumplet
ma het Stimma khört
us em Wald här sin Lüt kho
vo der Häx ganz betört
Uf eimol sin alli um's Für ummatanzet
und d'Kinder hens g'opferet
amana grausama Gott
der Bösewicht het no a gspässigi
Predigt abakanzled
und z'Bluat isch scho gflossa
uf em schwarza Schafott
Aber kum sinds denn gstorba
sinds bald wieder gebora
der Daniel als Löwe mit spitziga Ohra
und d'Susi als Fisch imana durchsichtiga Bach
der Löwe isch go luaga was z'Fischli ächt macht
und jeda n'Obed wenn ders sälber wenn gseh
goht der Löwe am Bach no entlang bis zum See
und wärs will erlösa vo dem Fluach und dem Bann
muass sälber zaubera und verhäxa wenn er kann


Märli von Walter Lietha wurde 1980 auf dem Album Liebi Schwizer Guat Nacht veröffentlicht.

Mike Konia

Sprache, Politik, Ökonomie, Philosophie, Literatur, Alltägliches, Kurioses